Para sa aming Lolo Fred Santiago, Sr.

Isa ka raw mahusay na litratista

Marahil sa iyo nagmana

Ang kahusayan sa sining ng aming ama at mga kapatid niya.

Isa ka raw mabuting asawa

Marahil sa iyo nakuha

Ang katangiang mapagmahal ng aming ama.

Nakakalulungkot lamang na

Hanggang kwento na lang

Ang iyong ugali, galing, at mukha.

Marahil maaga kang kinuha

Ng Panginoong sayo'y lumikha

Upang ang mga anak mo'y matutong tumayo sa sarili nilang paa.

Agad-agad ka mang nagpaalam sa madla

Hindi ka man lang nakilala o nakita

Ngunit tanging iniwan mo'y magagandang alaala.

Sa isang bagay ako ay sigurado

Ang aking ama na nanggaling sa iyo

Ay hindi magiging siya kung di dahil sayo

Isa ka raw mabuting ama.

Kanino pa ba magmamana

Ang iyong Junior, ang napakabait naming Papa.

Maligayang kaarawan sa aming Lolo

Sana po makarating sa inyo ito.

Mahal po kayo ng inyong mga apo.

Salamat po sa oras na itinagal niyo sa mundo

Makabuluhan, mahalaga, kapakipakinabang

Kayo ang puno ng angkan ng magagaling na Santiago.

Maligayang Kaarawan po, Lolo*! :)

---

Isang pag-alala sa ika-80 anibersaryo ng kapanganakan ni Alfredo Villaranda-Santiago, Sr. (Oct. 16, 1930-May 16, 1976)

Papa

Hindi ko makakalimutan

Kung gaano ko ginusto

Na sana naroroon ka

At nanunuod sa akin

Habang inaabot ang diploma ko

Mula sa UP,

Nasabi sa sarili,

Na tila may luha sa mata,

Natupad ko ang pangarap mo.

Naalala ko pa noong ako'y

Maliit pa sa gamu-gamo

Na ikaw ay humahanga

Sa galing ko gumuhit, at sa eskwela.

Hindi mo lang alam

Sa'yo nagmula lahat ng iyon

Minana ko, hindi mo ipinagdamot

At naging inspirasyon ko sa bawat pagbangon.

Ang aking talento

Ang aking pagkatao

Ang aking pangarap

Wala lahat, kung di dahil sa'yo.

Kaya nang ika'y nangibang-bansa

Hindi dahil gusto mo

Ay tila may napakalaking nawalang

Puwang sa ating bahay, sa aming buhay.

Ngunit kahit ika'y nawalay sa aming matagal

Di nawala ang aming pagmamahal at iyong

Tiwala'y di kailanman ninais masira

Kaya't nag-aral, nagsikap, para sa muling pag-uwi'y

Masaya.

Sa tuwing ika'y uuwi, binibilang ang araw

Sa tuwing ika'y aalis, luha'y di kayang pigilan.

Kung may magagawa lang ako para manatili ka nalang dito

Iyon ay mag-aral ng mabuti, at sundin ang iyong payo.

Salamat at kahit malayo ka habang kami'y lumalaki

Ni minsan 'di naiba ang trato mo sa amin

Kami'y iyong mga anak pa rin na naghihintay, nag-aabang

Sa iyong pasalubong, sa iyong pagdating.

Gustuhin ko mang kasama ka namin sa bawat araw

Uunahi't uunahin mo pa rin

Ang kami'y may makain, para sa araw-araw

Mahirap man ang buhay, mahal mo naman kami.

Darating din ang araw na hindi mo na kailangang umalis

Ang araw na 'di ka na kailangan pa naming mamiss

Ang araw na makapag-papataas na tayo ng bahay

Ang araw na bawat umaga'y maririnig ang iyong ingay.

Abalang-abala kumayod sa Saudi

Mag-aayos ng mga sira sa bahay pagkauwi

Hindi ka napapagod, hindi ka tumatanda

Kami ang iyong inuuna, sarili mo'y mamaya na.

Maligayang kaarawan, Papa.

Nasa tula na ito ang lahat ng pangarap ko.

Mahal na mahal kita. Salamat po sa tiwala.